英國鄉下妹（5）手多多
我諗唔單只係我個女，每一個小朋友出街嘅時候都會手多多，四周圍搞。尤其是去到啲鋪頭，每個家長都好頭痛，我兩公婆都唔例外😆。
因為我兩公婆都好鐘意舊嘢，而英國嘅town仔又真係好多charity stores同古董（二手😝）鋪頭，啲Fair同show亦都有唔小厘類型嘅攤擋，所以我地經常都會去睇下望下。沒有姐姐，只要阿女唔洗番學，一家人去邊都當然一齊出動啦。
我地睇嘅同時，當然亦要看住阿女。佢手多搞人地嗰啲舊玩具或者兒童圖書當然無乜所謂，但係最怕就係佢去參與媽咪最鐘意睇嗰啲舊瓷器。如果整爛賠錢都事小，係真係唔好意思先係煩😩。
由於手多嘅事情經常發生，所以我兩公婆已經非常有默契。我地選擇唔會好似香港好多家長咁，大呼小叫（因為覺得咁樣比打爛嘢更令人討厭）。反而會帶阿女去佢可以摸得嘅物品區域，睇住佢由得佢去搞。我地發覺咁樣係比罵，捉著佢或者唔比佢掂有效。因為我認為作為小朋友，好奇係天性黎。與其強制唔比，令到一家人响度鬼晒咁嘈，甚至引起小朋友反叛，更加令他人不安及不滿。所以，不如响控制範圍內比佢自由啲，我發現效果反而更好。
當然，厘個方法我相信只會响英國比較有效，因為厘度嘅人對小朋友嘅行為比較了解，對佢地嘅行為容忍限度比較高。我亦覺得人在英國，一切都在乎互相尊重，厘樣係比什麼「容入社會」較為重要。老實講，住响香港土生土長，今時今日我都未必容到入個社會啦。
不過，都有好多唔好意思嘅時候嘅，就係阿女好「安份」咁手多嘅時候，有啲好有愛心嘅鋪頭或者攤擋嘅老板，會忽然話送咗阿女搞緊嘅嘢比佢😅。每次發生，通常啲老闆都係好堅持嗰隻（圖中就係其中一樣）。厘啲時候就係最尷尬，想比番錢又唔肯收，好大力咁拒絕又好老土，唯有叫阿女好好咁講多謝。不過我地都會好識做咁買番啲其它嘢嘅！就係厘種互相嘅尊重，就可以真係感覺到小鎮嘅人情味😊
另外，阿女亦係一個好有愛心嘅人，响街到一見到狗就要衝去摸同say hello。因為我地自己都養狗，我地真係唔係好怕狗嘅。不過，我地亦都明白有時啲主人未必喜歡，加上小朋友動作太大，係會嚇親啲狗狗😱。
當次次都係咁嘅時候，我唯有每次都拖住阿女，走去好有禮貌咁問狗狗嘅主人。做多幾次之後，我地就叫佢自己去問。依家阿女其本上係唔理我地，自己會走去問，而唔再會一下就衝埋去隻狗狗度。我發現原來，厘樣反而係佢社交上最大膽嘅嘢，同陌生小朋友玩都無咁大膽。
#英國鄉下妹 #手多唔係罪 #嘈都無用 #大呼小叫只係會討人厭 #互相尊重係好重要
**********************
英國鄉下妹（1） 番Pre-School
http://bit.ly/2vopOLG
英國鄉下妹（2） 去County Show
http://bit.ly/2utUuhf
英國鄉下妹（3） 讀完第一個學期
http://bit.ly/2vH0kvo
英國鄉下妹（4） 變咗Google Translate？
http://bit.ly/2wvyDDC
**********************
Search